Ĕнер, ака уйӑхĕн 28- мĕшĕнче,  чӑваш чĕлхи эрнин планĕпе килĕшӳллĕн, Тăвай муниципалитет округĕн Тушкил пĕтĕмĕшле пĕлÿ паракан вӑтам шкулта  Иван Яковлевич Яковлев 175 ҫул тултарнине, «Телейлĕ ачалăх» çулталăка халалласа «Чăваш Улăпĕн ячĕ манăçмĕ нихçан!» ятлă савӑнӑҫлӑ концерт пулчĕ. Концерта 1-9 класра  вĕренекенсем тӑрӑшса хатĕрленнĕ.  Илемлĕ тумлӑ ачасем пĕрин хыҫҫӑн тепри сцена ҫине тухса хӑйсен пултарулӑхне кӑтартрĕҫ: сӑвӑ вуларĕҫ, ташларĕҫ, юрларĕҫ, ача –пăча вăййисене  кăтартрĕç. Иван Яковлев калавĕсем тӑрӑх хатĕрленĕ инсценировкӑсене те пӑхма питĕ кӑмӑллӑ пулчĕ. Уяв концертне  Васильева Русланăпа( 9 кл) Селиванов Дмитрий (10 кл.) ертсе пычĕç. Вĕсем  чăваш чĕлхи пуян та илемлĕ, янăравлă та çепĕç, паха та асамлă пулнине палăртрĕç. Иван Яковлевич ячĕ чăваш халăхĕшĕн яланах хисеплĕ те чыслă пулнине, унăн чапĕ халăх хушшинче паянхи кун та иксĕлменни çинчен калаçрĕç. Чăвашсен çĕнĕ çырулăхне йĕркелени, кĕнекесем пичетлеме пуçлани, чăваш ачисем валли шкулсем уçни халăх кун-çулĕнче питех те пысăк пĕлтерĕшĕ пирки асăнса хăварчĕç.