Ака уйăхĕн 25-мĕшĕнче эпир пин-пин çул аталанса, ламран лама куçса пырса пирĕн вăхăта çитнĕ    илĕртÿллĕ те янăравлă Чăваш чĕлхи кунне уявлатпăр.Чăваш чĕлхи кунне Чăваш Республикин Аслă Совечĕн Президиумĕ 1992 – мĕш çулхи ака уйăхĕн 9 – мĕшĕнчи йышăнăвĕпе килĕшÿллĕн аслă вĕрентекенĕмĕр И. Я. Яковлев çуралнă кун уявлама тытăннă. Иван Яковлевич Яковлев — чăваш халăхне çутта кăларакан, чăваш алфавитне тăвакан, чăваш букварьне хатĕрлекен, чăваш ачисем валли шкул уçакан çын пулнă. Паян  И.Я.Яковлев çуралнăранпа 175 çул çитрĕ. Çак кун ачасен чăваш чĕлхине тата литературине вĕренес туртăмне вăйлатас, вĕренекенсен пултарулăхне, тавракурăмне аталантарас шутпа 7-8-мĕш классем хушшинче «Аслă патриарх кун-ҫулĕн йĕрĕ» темăллă викторина  иртрӗ.  Ĕçсем ачасемшӗн кăсăк та илӗртÿллӗ пулчӗç. Вӗсем çĕннине чылай пӗлчӗç. Викторина ыйтăвĕсене 7-мĕш класра вĕренекенсем тĕплĕнрех те туллин хуравласа мала тухрĕç. «И. Я. Яковлев тата унăн вĕренекенĕсем» темăпа хатĕрленĕ викторина 9-10-мĕш классем хушшинче иртрĕ. Ку викторинăра вуннăмĕшсем маттуртарах пулчĕç. Мероприяти усӑллӑ та кӑсӑклӑ иртрĕ. Ачасем чăваш халăхне ҫутта кăлараканĕ тата унăн  вĕренекенĕсем çинчен сахал мар пĕлнине кăтартса пачĕç.