Паян, ака уйăхĕн 19-мĕшĕнче,чăваш чĕлхи эрнине халалласа Тушкилти пĕтĕмĕшле пĕлÿ паракан вăтам шкулта тĕрлĕ мероприяти иртрĕ. 5-6-мĕш классем хушшинче «Çак çĕре эсир пĕлетĕр-и?»  вăйă-конкурс  иртрĕ. Вăйăра чăваш чĕлхипе, литературипе, тăван ен культурипе çыхăннă ыйтусем пулчĕç.5-6-мĕш классем хушшинче 31 балл пухса улттăмĕшсем çĕнтерÿçĕсем пулчĕç. 7-8-мĕш классем хушшинче „Аслă патриарх кун-çулĕн йĕрĕпе“ викторина пулчĕ. Вĕренекенсем „Чăваш ачисем“ (7 кл.) тата „Çăлтăрсем“(8 кл.) ушкăнсем çине  пайланса тĕрлĕ ĕç турĕç: ваттисен сăмахĕсене вĕçлерĕç, фразеологизмсен пĕлтерĕшне тупса вырăсла куçарчĕç, пĕр-пĕрне тупмалли юмахсем пачĕç, логогрифсен хуравĕсене тупрĕç, И. Я. Яковлевпа, чăваш çырулăхĕпе çыхăннă ыйтусем çине хуравларĕç. Малти вырăна "Çăлтăрсем“(8 кл.) ушкăн тухрĕ, саккăрмĕшсен хуравĕсем туллинрех те тĕрĕсрех пулчĕç. Çак кунах 9-10-мĕш классем хушшинче «Мĕн?Аçта?Хăçан?» ăс-тăн вăййи пулчĕ. Ку тупăшура 10-мĕш класра вĕренекенсем çĕнтерÿçĕсем пулса тăчĕç.